Hagaskólanemendur hittast

„Þetta hefur ekki verið gert í fimmtán ár og við ætlum núna að bjóða fimmtán árgöngum, öllum sem voru í Hagaskóla á árunum 1950 til 1965,“ segir Ólafur Jóhannsson sem stendur fyrir „Re-unioni“ gamalla Hagaskólanema ásamt Guðjóni B. Hilmarssyni. „Það verða tvær gamlar skólahljómsveitir að spila, Sweet Dreams og Cogito, þetta verður mjög skemmtileg veisla.“

Ólafur og Guðjón komu báðir að tónlistar- og skemmtanalífinu á þessum árum. Guðjón trommar einmitt í báðum hljómsveitunum sem spila um kvöldið.

Margir sem hafa síðar orðið þjóðþekktir Íslendingar gengu í Hagaskóla á þessum árum. Meðal þeirra eru Bogi Ágústsson fréttamaður, sem verður ræðumaður kvöldsins, Sigrún Hjálmtýsdóttir, Diddú, stórsöngkona, Davíð Oddsson Seðlabankastjóri og Eggert Þorleifsson leikari.

„Við munum standa fyrir ýmsum óvæntum uppákomum í tengslum við þetta í vikunni en það er allt saman leyndarmál enn sem komið er. Gamilr kennarar munu líka mæta á svæðið.“

Veislan verður haldin daginn fyrir uppstigningardag, á miðvikudag, í Félagsheimili Seltjarnarness. Ekki verður beðið um nafnskírteini við innganginn og Ólafur hvetur alla gamla Hagaskólanema til að mæta. Miðasala fer fram í Blómagalleríinu á Hagamel.