Aflaverðmæti eyskt um rúm 10 prósent milli ára

Aflaverðmæti íslenskra skipa nam nærri 58 milljörðum króna á fyrstu átta mánuðum ársins samkvæmt samantekt Hagstofunnar. Það er 5,5 milljörðum króna meira en á sama tímabili í fyrra og nemur aukningin því rúmum tíu prósentum á milli ára.

Aflaverðmæti botnfisks var í lok ágúst orðið 43 milljarðar miðað við rúma 39 milljarða á sama tíma í fyrra. Þannig nam verðmæti þorskafla rúmum 21 milljarði fyrstu átta mánuði þessa árs og jókst um 18 prósent en aflaverðmæti ýsu var rúmir níu milljarðar sem er um fimmtungsaukning milli ára. Hins vegar dróst verðmæti ufsaaflans saman um nærri ellefu prósent og var það tæpir þrír milljarðar króna í lok ágúst.

Verðmæti flatfiskafla dróst saman um rúm 15 prósent en verðmæti uppsjávarafla jókst hins vegar um nærri 29 prósent á milli ára. Munar þar mestu um aukið verðmæti loðnu eftir því sem Hagstofan greinir frá.