Mexíkóar mótmæla lögum um landamæravegg

Mexíkóskir leiðtogar gagnrýna lög sem George W. Bush, Bandaríkjaforseti, undirritaði í gær, þess efnis að reisa skuli mannhelda girðingu á landamærum landanna tveggja. Forseti Mexíkó, Vicente Fox, og verðandi forseti Felipe Calderon, segja að þetta muni ekki leysa innflytjendavanda Bandaríkjanna.

Bandaríkjamenn segja girðinguna einnig hafa þann tilgang að koma í veg fyrir hverskonar árásir eða eiturlyfjainnflutning. Áætlað er að á bilinu fjórar milljónir til fimm og hálf milljón Mexíkóa séu ólöglegir innflytjendur í Bandaríkjunum.

Bush sagði í ræðu í gær að þó að Bandaríkjamenn væru innflytjendaþjóð, þá væri þjóðfélag þeirra umfram allt byggt á lögum. Því ætla Bandaríkjamenn, auk girðingarinnar, að koma fyrir öryggismyndavélum, gervihnöttum og ómönnuðum flugförum til að fylgjast með því að ekki streymi fleiri ólöglegir innflytjendur til Bandaríkjanna en orðið er.