Sharon 78 ára í dag

Engin breyting virðist á líðan Ariels Sharons, forsætisráðherra Ísraels, en hann er 78 ára í dag. Hann liggur enn í dái á sjúkarhúsi í Jerúsalem eftir að hann fékk alvarlegt heilablóðfall snemma í síðasta mánuði. Sharon er enn í lífshættu en læknar segja líðan hans þó stöðuga. Þeir segja að batahorfur hans minnki með hverjum degi sem líði.

Ehud Olmert, starfandi forsætisráðherra, hóf ríkisstjórnarfund í morgun á því að óska Sharon til hamingju með afmælið og skjótum bata. Búist er við að nýstofnaður Kadima flokkur Sharons vinni sigur í þingkosningum í Ísrael 28. mars næstkomandi þó stofnandi sjálfur verði líkast til fjarri góðu gamni.