Fangar taka yfir fangelsi í Kabúl

Fangar í einu rammgirtasta fangelsi í Kabúl, höfuðborg Afganistan, hafa tekið yfir hluta þess að því er yfirvöld þar í landi upplýstu í dag. Fjölmargir afganskir hermenn voru fluttir á staðinn í morgun en í Policharki-fangelsi eru 1300, þar á meðal liðsmenn al-Kaída samtakanna og Talíbanar.

Eftir að flóttatilraun fanganna í gærkvöldi misheppnaðist tóku þeir á það ráð að neyða fangaverði út úr kvenna-álmu fangelsins. Verið er að herða öryggisgæslu í fangelsinu og bæta aðstöðu fanganna áður en rúmlega hundrað meintir hryðjuverkamenn verða fluttir þangað úr Guantanamo-fangelsinu á Kúbu.

Í síðasta mánuði tókst sjö Talíbönum að flýja úr fangelsinu og því virðist ekki vanþörf á að herða öryggisgæslu.