Rússar réðu tilræðismann páfa

Ítölsk þingnefnd, sem hefur rannsakað tilræðið við Jóhannes Pál páfa annan árið 1981, segir óyggjandi sannanir fyrir því að ráðamenn í Moskvu hafi staðið fyrir tilræðinu.

Jóhannes Páll páfi var skotinn á Péturstorginu í Róm þrettánda maí árið 1981. Nokkrum mínútum síðar var Tyrkinn Mehmet Ali Agca handtekinn og síðar sakfelldur fyrir tilræðið við páfa.

Níundi áratugur síðustu aldar var umbrotatími í heimalandi páfa, Póllandi. Sagnfræðingar segja aðgerðir verkalýðsfélagsins Samstöðu þar í landi hafa hjálpað til við að flýta hruni kommúnismans í Austur-Evrópu. Páfi var dyggur stuðningsmaður félagsins og það mun hafa verið þyrnir í augum ráðamanna í Sovétríkjunum.

Árið 1986 var réttað yfir þremur Tyrkjum og þremur Búlgörum en þeir voru sýknaðir þar sem saksóknara tókst ekki að færa sönnur á að búlgarska leyniþjónustan hefði ráðið Agca til að myrða páfa fyrir sovéska ráðamenn.

Kafli um tilræðið var í skýrslu Mitrokhin-nefndarinnar sem rannsakaði uppljóstranir Rússans Vasilis Mitrokhins sem flúði til Bretlands árið 1992. Í fyrra hóf ítölsk þingnefnd rannsókn á tilræðinu á ný og mun skýrsla hennar liggja fyrir síðar í þessum mánuði.

Fréttastofa Reuters hefur hana þó undir höndum. Ákveðið var að opna málið aftur eftir að páfi sjálfur lýsti því yfir í bókinni að hann væri sannfærður um að einhver annar en Agca hefði skipulagt tilræðið og fengið hann til að ráða sig af dögum.