Bók sem allir verða að lesa

"To kill a Mockingbird" eftir Harper Lee var valin, á Degi bókarinnar í Bretlandi, sú bók sem allir ættu að lesa áður en þeir deyja. Bókin sló við ekki ómerkari bókum en Biblíunni, sem lenti í öðru sæti og Hringadróttinssögu sem hafnaði í því þriðja. Bókin gerist á fjórða áratugnum í Suðurríkjum Bandaríkjanna og fjallar um svartan mann sem er ranglega sakaður um að hafa nauðgað hvítri stúlku og hlaut höfundurinn Pulitzer Prize verðlaunin fyrir hana á sínum tíma og eftir henni gerð kvikmynd með Gregory Peck í aðalhlutverki árið 1962.

Dagur bókarinnar í Bretlandi var í gær og fyrir valinu stóðu bókasafnsfræðingar. Athygli vakti að meðtsölubókin Da Vinci lykillinn komst vart á blað í valinu.

Í næstu sætum voru svo klassísk bókmenntaverk eins og Jane Eyre eftir Charlotte Bronte, Jólasaga Charles Dickens og Hroki og hleypidómar eftir Jane Austin.

Það voru ekki margar nýútkomnar bækur sem náðu inn á listann og aðeins Undarlegt háttarlag hunds um nótt eftir Mark Haddon og Svo fögur bein eftir Alice Sebold náðu inn á topp þrjátíu.