Chirac dregur atvinnulöggjöfina til baka

Jacques Chirac, Frakklandsforseti, hefur tilkynnt að nýlegar breytingar á atvinnulöggjöf verði dregnar til baka. Breytingarnar hafa valdið miklum mótmælum í Frakklandi á undanförnum vikum, en nú segir forsetinn að lagðar verði fram nýjar áætlanir sem leysa eiga atvinnuvanda ungs fólks.

Tilkynning Chiracs í dag er reiðarslag fyrir forsætisráðherra Frakklands, Dominique de Villepin. Hann hefur barist fyrir löggjöfinni þrátt fyrir mikil mótmæli stúdenta víðs vegar um Frakkland og sagst harma skilningsleysi almennings á henni. Mótmælendur hugðust tilkynna í dag hvort áfram ald yrði á kröfugöngum og verkföllum sem hafa fram að þessu verið ansi hávær og á stundum ofbeldisfull. Tilkynningin nú kemur eftir viðræður milli verkalýðsfélaga og lögfræðinga á vegum Chiracs. Talsmaður forsetaskrifstofunnar segir að í nýju áætluninni sé reynt að taka á aðstæðum ungs fólks sem eigi erfitt uppdráttar. Hún muni koma í stað löggjafarinnar, sem hefði gert atvinnurekendum auðveldara með að segja upp starfsfólki sem er yngra en 26 ára án nokkurra skýringa.