Vilja að stuðlað verði að farsælum starfslokum

Framkvæmdarstjórn Starfsgreinasamband Íslands krefst þess að stjórnvöld hefjist strax handa við stefnumörkun um atvinnuuppbyggingu á Suðurnesjum. Í ályktun sem framkvæmdarstjórnin sendi frá sér segir að gera verði þá kröfu til íslenskra stjórnvalda og Bandaríkjahers sem atvinnurekanda að stuðlað verði að farsælum starfslokum allra starfsmanna og leita til leiða til að draga úr afleiðingum uppsagnanna með félagslegri aðstoð.

Ályktun framkvæmdastjórnar SGS 21. mars 2006.

,,Framkvæmdastjórn Starfsgreinasambands Íslands, SGS, lýsir undrun sinni á því hvernig Bandaríkjastjórn stóð að einhliða ákvörðun um að draga herþotur sínar og þyrlusveit burt frá Keflavík. Það virðist ljóst að varnarstöðin þjónar ekki tilgangi og verður lokað. Hversu skyndilega og hratt málið ber að er áfall fyrir þá rúmlega 600 einstaklinga og fjölskyldur þeirra sem verða fyrir barðinu á hópuppsögnunum, sem og atvinnulífið á Suðurnesjum. Þess vegna verður að beita öllum ráðum til að milda áhrif uppsagnanna.

Gera verður þá kröfu til íslenskra stjórnvalda og Bandaríkjahers sem atvinnurekanda, að þau stuðli að farsælum starfslokum allra starfsmanna, sérstaklega þeirra sem ekki eiga afturkvæmt til nýrra starfa. Fara þarf í hvívetna eftir ákvæðum laga um hópuppsagnir og leita leiða til að ,,draga úr afleiðingunum uppsagnanna með hjálp félagslegra aðgerða sem hafa það m. a. að markmiði að auðvelda flutning í önnur störf eða endurmenntun starfsmanna sem áformað er að segja upp."

Vegna brottfarar varnarliðsins verða stjórnvöld strax að taka af skarið um nýtt framtíðarhlutverk Keflavíkurflugvallar. Framkvæmdastjórn SGS telur að fjölmörg tækifæri séu til atvinnuuppbyggingar á svæðinu. Þau tækifæri og þá atvinnuuppbyggingu, verði að skoða og vinna í samvinnu við heimamenn og innlendar og alþjóðlegar stofnanir sem láta sig samgöngur og öryggi þeirra varða.

Einnig má nefna tækifæri, sem tengjast orkumálum og umhverfismálum norðurslóða, sem dæmi um mikilvæg verkefni í alþjóðlegu samhengi sem Ísland getur gegnt miklu hlutverki í vegna legu sinnar og jarðfræðilegara eignileika, einkum á Reykjanesi.

Framkvæmdastjórn SGS, gerir þá kröfu til stjórnvalda að strax verði hafist handa við stefnumörkun um atvinnuuppbyggingu á Suðurnesjum og að einblína ekki um of á varnar- og öryggismál, þegar framtíðarsýn á Suðurrnesjum eru til skoðunar."