Hollvinasamtök skattgreiðenda stofnuð í dag

Hollvinasamtök skattgreiðenda voru stofnuð í dag en markmið þeirra er að standa vörð um hagsmuni skattgreiðenda. Hátt á þriðja tug manna höfðu skráð sig í samtökin nú síðdegis.

Það er Samband ungra sjálfstæðismanna sem er stofnandi samtakanna en öllum er frjálst að ganga í samtökin. Borgar Þór Einarsson, formaður Sambands ungra sjálfstæðismanna, segir að skattgreiðendur eigi fáa vini og stofnun samtaka sem þessa sé því löngu tímabær vegna sívaxandi ásælni í skattfé almennings. Hann segir það kröfu samtakanna að skattar verði lækkaðir og skattgreiðendur verði upplýstir um hvernig skattfé þeirra sé ráðstafað.

Mörgum gæti þótt Hollvinasamtöki skattgreiðenda hljóma undarlega en Borgar segir samtökin ekki vera neitt grín. Borgar segir að honum þyki mörg hollvinasamtök vera grín líkt og hollvinasamtök vegafræmkvæmda ýmisskonar en þetta sé ekkert grín, félögum í Sambandi ungra sjálfstæðismanna sé fúlasta alvara.