Vilja að ríkið bjóði út eldsneyti

Framkvæmdastjóri Atlantsolíu segir Ríkiskaup ekki vilja ræða við fyrirtækið um hugsanlegt útboð á eldsneytiskaupum fyrir ríkið. Hann segir undarlegt að ríkið vilji áfram eiga viðskipti við stóru olíufélögin í ljósi þess að ríkisstjórnin hafi ákveðið að leita réttar síns vegna meints ólöglegs samráðs þeirra.

Ríkiskaup gerðu árið 2003 samning við Esso og Shell um kaup á eldsneyti, olíum og öðrum rekstrarvörum fyrir ökutæki og vélar ríkisins að undangegnu útboði. Sá samningur var til tveggja ára en með möguleika á framlengingu um eitt ár í tvö skipti. Fyrri hluti framlengingarinnar rennur út 29. apríl næstkomandi og því spurning hvort framlengt verði aftur í ár.

Atlantsolía hafði áhuga á að bjóða í eldsneytiskaupin og hafði því samband við Ríkiskaup til þess að afla sér upplýsinga um málið og um það hvort samningurinn yrði endurnýjaður. Þar voru svörin snubbótt að sögn framkvæmdastjóra Atlantsolíu. Hann segir forstjóra Ríkiskaupa hafa sagt við forsvarsmenn Atlantsolíu að þeim kæmi málið ekki við.

En síðasti samningur snerist um fleira en eldsneyti og olíu því ýmsar aðra rekstarvörur fyrir ökutæki og vélar voru boðnar út. Geir segir vel hægt að eldsneyti, olíu og vörur hvert í sínu lagi. Það sé mjög algengt að ríkið skipti hlutum upp til að fá sem flesta til að bjóða í viðskiptin. Það geri ríkið til þess að reyna að lækka innkaupakostnað og skapa meiri samkeppni. Þannig eigi það líka að vera með eldsneyti að mati Atlantsolíu.

Hann bendir á að Atlantsolía hafi vaxið hratt síðustu ár og geti nú þjónustað 65 prósent af ökutækjum ríkisins. Þá vill að hann að ríkið sýni gott fordæmi vegna hins meinta samráðs stóru olíufélaganna. Ríkið ætli að sækja rétt sinn gagnvart félögunum og því sé skrýtið að það framlengi samninga við þau í stað þess að bjóða þá út.

Geir segist forsvarsmenn Atlantsolíu áfram ætla að reyna að fá fund með forstjóra Ríkisskaupa og fjármálaráðherra líka. Ekki náðist í Júlíus Ólafsson, forstjóra Ríkiskaupa, fyrir hádegi vegna málsins.