Verulegt tjón á Djúpadalsvirkjun

Franz Árnason, framkvæmdastjóri Fallorku ehf. sem rekur Djúpadalsvirkjun í Eyjafjarðarsveit, segir að verulegt tjón hafi orðið á virkjuninni í dag þegar efri stíflan í virkjuninni brast eftir mikið úrhelli í Eyjafirði á síðasta sólarhring.

Það leiddi til þess að fljóðbylgja æddi niður ána og rauf Eyjafjarðarveg vestri meðal annars með þeim afleiðingum að bíll hafnaði ofan í ánni. Manni sem var í bílnum var bjargað úr honum en honum varð ekki meint af.

Forsvarsmenn Norðurorku, sem er móðurfélag Fallorku, skoðuðu aðstæður í dag eftir stíflurofið og segir Franz að talið sé að einhvers konar hamfarir hafi átt sér stað, þ.e. að skriðuföll eða klakastíflur hafi fallið niður í lónið og rutt úr vegi hluta stíflunnar sem er jarðvegsstífla. Neðri stíflan, sem er steypt, hafi hins vegar staðið hlaupið af sér.

Franz segir að vatn hafi komist inn í bæði stöðvarhús Djúpadalsvirkjunar en ekki sé ljóst hversu mikið tjónið hafi orðið þar. Eftir eigi að hleypa á rafmagni til þess að kanna það en hann eigi von á að viðkvæmur stjórnbúnaður í stöðvarhúsinu hafi skemmst.