Ragnheiður Ríkharðsdóttir í prófkjör

Ragnheiður Ríkharðsdóttir, bæjarstjóri og oddviti sjálfstæðismanna í Mosfellsbæ hefur tekið ákvörðun um bjóða sig fram i í prófkjöri sjálfstæðismanna í Suðvesturkjördæmi fyrir komandi Alþingiskosningarnar sem fram fer 11. nóvember. Ragnheiður sækist eftir 3. sæti listans, að því er kemur fram í tilynningunni frá henni.

Ragnheiður er íslenskufræðingur með uppeldis - og kennsluréttindi frá HÍ og framhaldsnám í menntunarfræðum með áherslu á stjórnun frá KHÍ. Hún starfaði sem kennari og skólastjóri í yfir 20 ár. Ragnheiður hefur verið oddviti sjálfstæðismanna í bæjarstjórn og bæjarstjóri í Mosfellsbæ frá 2002 og hefur setið í Stjórn sambands íslenskra sveitarfélaga frá 2002 og í nefndum á vegum þess. Ragnheiður var tilnefnd af dómsmálaráðherra í verkefnastjórn um nýskipan lögreglumála og hefur gegnt ýmsum trúnaðarstörfum fyrir Sjálfstæðisflokkinn. Ragnheiður er kunn fyrir brennandi áhuga og þekkingu á mennta- og íþróttamálum og hefur fylgt eftir af krafti úrbótum í samgöngumálum. Ragnheiður er gift Daða Runólfssyni og þau eiga tvö börn og þrjú barnabörn.