Steinn Kárason gefur kost á sér í 3.-5. sæti

Steinn Kárason umhverfishagfræðingur hefur ákveðið að gefa kost á sér í 3.-5. sæti í prófkjöri um framboðslista Sjálfstæðisflokksins í Reykjavík fyrir komandi alþingiskosningar.

"Náttúruvernd og skynsamleg nýting náttúruauðlinda eru meðal krefjandi viðfangsefna sem bíða úrlausnar á næstu árum. Einnig umhverfismál almennt. Menntamál, nýsköpun og rannsóknir eru lykilinn að velmegun og samkeppnishæfni þjóðarinnar á alþjóðavettvangi. En höfum líka hugfast að fjölskyldan er hornsteinn samfélagsins. Ég tel að Sjálfstæðisflokkurinn eigi að hafa forustu í þessum málum til farsældar fyrir samfélagið. Ég vil leggja mitt af mörkum til að svo megi verða," segir Steinn í fréttatilkynningu sem hann sendi frá sér.

Hann segir umhverfismál snerta samfélagið í stóru og smáu, hvort sem fjallað er um skipulags-, efnahags- eða samfélagsmál. "Við þurfum að líta á þessi mál sem eina heild. Gríðarlegur ávinningur er fólginn í skynsamlegri umhverfisstjórnun. Í þeim efnum er meðalhófið farsælast".

Það er mjög brýnt að á listann veljist öflug breiðfylking fólks sem hefur færni til að viðhalda einu mesta hagsældar- og framfara skeiði í sögu íslensku þjóðarinnar.

Tryggja þarf frelsi einstaklinga til athafna í þágu lands og þjóðar en jafnframt þurfum við að sýna þann manndóm og mildi að rétta hjálparhönd þeim sem það þurfa og hafa í heiðri hin sígildu kjörorð Sjálfstæðisflokksins, "stétt með stétt".

Steinn lauk M.Sc.-prófi í umhverfisstjórnun og alþjóðaviðskiptum frá Álaborgarháskóla 2002, Diploma í umhverfisfræðum 2001 frá Copenhagen Business School, University of Pietermaritzburg og Durban í Suður-Afríku. Lauk B.Sc.-gráðu í viðskiptafræði frá Háskólanum á Bifröst 2000, er iðnrekstrarfræðingur frá TÍ og garðyrkjufræðingur frá Garðyrkjuskólanum.

Situr í stjórn Félags sjálfstæðismanna í Smáíbúða-, Bústaða- og Fossvogshverfi. Fulltrúi Menntamálaráðuneytisins í Umhverfisfræðsluráði. Formaður foreldraráðs Fossvogsskóla og í stjórn foreldrafélags Fossvogsskóla. Er í stjórn Félags Skógarskáta. Ritari í stjórn Félags garðyrkjumanna 1980 - 1983 og um árabil í trúnaðarmannaráði og samninganefnd félagsins.

Steinn hefur m.a. sinnt háskólakennslu og ráðgjafarstörfum. Hann er m.a. kunnur fyrir bækur sínar og frumkvöðlastarf við endurheimt Brimnesskóga í Skagafirði.