Hæstiréttur staðfestir sýknudóm á 365 prentmiðla

Hæstiréttur hefur staðfest sýknudóm Héraðsdóms Reykjavíkur í máli Jónínu Benediktsdóttur á hendur 365 prentmiðlum og Kára Jónassyni, ritstjóra Fréttablaðsins, vegna tölvupósta í tengslum við upphaf Baugsmálsins.

Jónína Benediktsdóttir fékk sett lögbann á flutning Fréttablaðsins sem byggðist á tölvupósti hennar í tengslum við Baugsmálið og fór fulltrúi sýslumanns á ritstjórnarskrifstofu blaðsins og lagði hald á gögn. Jónína krafðist þess að lögbannið sem og haldlagning gagnanna yrði staðfest fyrir dómi og að ritstjóri blaðsins yrði látin sæta ítrustu ábyrgð og greiddi 5 milljónir króna í bætur. Héraðsdómur vísaði bótakröfunni frá dómi og synjaði kröfunum vegna lögbannsins.

Hún áfrýjaði málinu til Hæstaréttar en þar féll hún frá kröfum um refsingu yfir Kára Jónassyni í málinu með vísan til laga um bann við að hnýsast í gögn sem séu einkamál. Kári var þó áfram inni í málinu vegna ábyrgðar sinnar sem ritstjóri og ábyrgðarmaður.

Hæstiréttur komst að þeirri niðurstöðu í dag að krafa Jónínu um lögbann væri í senn of víðtæk og óákveðin til þess að taka mætti hana til greina og því var henni hafnað. Kári Jónasson var jafnframt sýknaður. Fallist var að skrif Fréttablaðsins um fjárhagsleg málefni Jónínu hefðu lotið að lögum um einkamál svo og skrif blaðsins um hvatningar Jónínu og annarra í ráðagerðum um að kæra Baugsmenn. Hins vegar var litið til þess að skrif Fréttablaðsins hefðu haft að geyma efni sem ætti erindi við almenning og þótt jafnframt hefði verið greint frá fjárhagsmálefnum Jónínu var talið að þau væru svo samfléttuð fréttaefninu í heild að ekki yrði greint á milli. Því hefði ekki verið gengið nær einkalífi Jónínu en óhjákvæmilegt væri í opinberri umræðu um málefni sem varðaði almenning. Var því héraðsdómur látinn óraskaður.