HM er í Sviss

Það líður að jólum, rétt rúmar tvær vikur í HM. Ég hef verið í sambandi við ágætan túlk í Munchen, Pablo Perez Torres, mann ættaðan frá heitu löndunum en hefur verið ráðinn sem þýðandi og þulur hjá þýska landsliðinu. Hann var á leið með þeim í æfingabúðir, á ónefndum stað, sennilega til Sviss þar sem helstu landsliðin eru að undirbúa sig undir keppnina. Þannig hefur brasilíska landsliðið lagt undir sig eitthvert smáþorp og selur grimmt inná æfingar liðsins, mér skilst að 5000 manns hafi borgað sig inn í gær, svona einsog á landsleik Íslands og Andorra í Laugardalnum.

Þetta er stór hluti af eftirvæntingunni, líktog fyrir jólin, hvað verður í pökkunum, hvað fæ ég marga? Hvaða HM taktík eru menn að æfa í Sviss? Ég var að horfa á upptöku af úrslitaleik Frakka og Brasilíumanna frá því á HM 1998 í Frakklandi, og það fékk mig til að velta fyrir mér meintum yfirburðum Brasilíu í keppninni. Það er engin trygging fyrir því að þeir brilleri, hreint ekki, unnu Grikkir ekki EM?

Svo hef ég engar áhyggjur af því hvort leikmenn séu þreyttir eftir langt tímabil með félagsliðum sínum. Hversu erfitt er að æfa einu sinni eða tvisvar á dag og spila einn tvo leiki í viku?

Forréttindavandamál.

Það forvitnilega er líka að nú eru Van Basten og Klinsman báðir búnir að skipta út reyndum leikmönnum fyrir unga í hollenska og þýska liðinu, sumsé að fá inn viljunga flunkunýja leikmenn, og láta lífsreynda og jafnvel lífsþreytta leikmenn uppí stúku. Þetta er spennandi taktík, sem hleypir nýju blóði í liðin, og ekki síður áhorfendur.