Tékkland

Tékkar eru í E riðli ásamt Bandaríkjamönnum, Ganamönnum og Ítölum.  Þessi riðill á ekki að vefjast fyrir Tékkum en rétt er að geta þess að Bandaríkjamenn eru sýnd veiði en ekki gefin og Ítalir eru hungraðir eftir síðustu keppni. Því er ekki hægt að útiloka óvænt úrslit.

Tékkar fóru fjallabaksleið inn í keppnina, þeir sigruðu Norðmenn 2 – 0 samanlagt í umspili til að komast á HM. Þeir voru síðast með á HM sem Tékkóslóvakía árið 1990. Tékkar vilja helst láta lítið fyrir sér fara í lokakeppnum en nú er liðið í öðru sæti á styrkleikalista FIFA og líklegt til afreka.

Karel Bruckner stýrir liðinu, hann tók við árið 2001 eftir gott starf sem þjálfari Tékkneska liðsins skipað leikmönnum 21 árs og yngri. Hann hefur mikla reynslu og þekkir leikmenn sína mjög vel.

Það kom fátt á óvart þegar Bruckner tilkynnti HM lið sitt. “Þessi hópur var settur samann fyrir evrópukeppnina árið 2004 með heimsmeistarakeppnina 2006 í huga” sagði Bruckner þegar hópurinn var kunngerður.   

Leikstjórnandi Juventus Pavel Nedved reimaði aftur á sig landsliðsskóna til að sjá til þess að Tékkar kæmist á HM. Það gekk eftir og hann er liðinu enn mjög mikilvægur. Ekki má gleyma Tomas Rosicky, Milan Baros og markverðinum Petr Cech.

Fyrirliði: Tomas Galasek

Lykilmaður: Pavel Nedved

Gæti slegið í gegn: Tomas Rosicky