Neyðarástand vegna flóða

Þúsundir manna hafa orðið að yfirgefa heimili sín á flóðasvæðunum í Mið-Evrópu. Neyðarástandi hefur verið lýst yfir í nokkrum héruðum Tékklands eftir að ár tóku að flæða yfir bakka sína og í nágrannalöndunum er ástandið jafnframt uggvænlegt.

Mikil úrkoma hefur verið í Mið-Evrópu undanfarna daga og því hefur snjór í fjöllum bráðnað með ógnarhraða og fyllt ár og fljót á svæðinu. Tékkland hefur orðið verst fyrir barðinu á flóðinu en neyðarástandi hefur verið lýst yfir í sjö héruðum í suður- og austurhluta landsins. Björgunarsveitir hafa í allan dag unnið hörðum höndum við að rýma hús í þorpum við ár sem að öllu jöfnu eru lygnar, en eru nú sem beljandi stórfljót.

Alls hafa sjö manns týnt lífi í flóðunum, en auk þess er nokkurra saknað, þar á meðal sex ára gamals drengs frá bænum Kraslítse sem féll ofan í straumharða á í gærkvöld. Björgunarsveitir leituðu að honum í alla nótt en án árangurs. Tjón af völdum flóðanna í Tékklandi liggur ekki fyrir en fullvíst má telja að það hlaupi á tugum milljarða króna. Jiri Paroubek, forsætisráðherra landsins hét í dag að veita þeim sem urðu fyrir búsifjum alla þá aðstoð sem á þyrfti að halda. Íbúar annarra ríkja álfunnar hafa ekki heldur farið varhluta af ástandinu. Vatnið í Saxelfi hefur risið svo mikið að á annað þúsund manns hefur þurft að yfirgefa heimili sín við fljótið, svo sem í hinni sögufrægu borg Dresden í Þýskalandi. Í Austurríki brast stífla svo rýma varð hús í þorpi nærri höfuðborginni Vín. Neyðarástand ríkir í allmörgun sýslum Ungverjalands og hefur orðið að rýma hús þar og í Slóvakíu, Rúmeníu og Póllandi hefur vatnselgurinn valdið umtalsverðum skemmdum en engu manntjóni enn sem komið er.