Varp fugla getur verið í uppnámi vegna Mýrarelda

Varp fugla getur verið í uppnámi vegna sinueldanna á Mýrum og líklegt er að smárdýralíf skaðist vegna eldanna. Þetta er mat Náttúrufræðistofnunar Íslands en enn logar víða sina á Mýrum.

Mýrareldar eru nú orðnir með mestu sinubrunum sem um getur á Íslandi. Á heimasíðu Náttúrustofnunar Íslands segir að erfitt sé að spá fyrir um áhrif þeirra. Líkur eru þó á talsverðum gróðurbreytingum og reikna má með að ýmsar tegundir fugla muni eiga erfiðara með að finna sér hreiðurstæði í vor. Tugir slökkviliðsmanna og bænda hafa barist við sinueldana á Mýrum í dag og í gær. Dregið hefur úr eldinum í kvöld þó enn logi víða.