Ekkert erindi í ESB

Íslendingar hafa enga ástæðu til að ganga í Evrópusambandið meðan þeir hafa samninginn um Evrópska efnahagssvæðið. Þetta kom fram í máli Geirs H. Haarde, utanríkisráðherra, á málþingi lagadeildar í dag.

Geir sagði samninginn um evrópska efnahagssvæðið fullnægja öllum þörfum Íslendinga um Evrópusamvinnu. Hann væri allt sem við þyrftum en annað sem snerti ekki hagsmuni okkar væri ekki tekið með í samninginn.

Hann taldi takmarkaða þátttöku í pólitískri ákvarðanatöku Evrópusambandsins ekki ágalla á þátttöku Íslands í Evrópusamstarfi. EES-samningurinn væri einmitt það sem Ísland hefði samið um, ekki meira og ekki minna.

Ráðherra taldi ekki ráðlegt að Ísland gengi í ESB, meðal annars vegna fiskveiðistjórnunar sem myndi færast til Brussel og því að Íslendingar myndu greiða mun meira til Evrópusambandsins heldur en það sem fengist til baka með styrkjum og öðrum fjárveitingum. Hann dró mjög úr þeim rökum Evrópusambandssinna að verð á mat og öðrum nauðsynjum myndi lækka. Hann sagði Íslendinga hafa önnur ráð til að lækka matarverð með lækkun skatta og tolla og taldi það líklega þróun vegna áhrifa Alþjóðaviðskiptastofnunarinnar.