Úrskurði Samkeppniseftirlitsins líklega áfrýjað

Framkvæmdastjóri Flugþjónustunnar á Keflavíkurflugvelli, sem Samkeppniseftirlitið úrkurðaði í gær að hafi brotið samkeppnislög, býst við að úrskurðinum verði áfrýjað.

Samkvæmt úrskurði Samkeppniseftirlitsins misnotaði Flugþjónustan á Keflavíkurflugvelli, IGS, markaðsráðandi stöðu sína við afgreiðslu farþegavéla á flugvellinum og var gert að greiða 80 milljónir króna í sekt. Þegar fyrirtækið Vallarvinir hóf starfsemi á sama sviði á Keflavíkurflugvelli árið 2001 náði það samningum við þýska flugfélagið LTU, sem áður hafði verið í viðskiptum við IGS. Þremur árum seinna gerði IGS þýska flugfélaginu nýtt tilboð sem var nokkuð lægra en samningur þess við Vallarvini hljóðaði upp á. Í úrskurði Samkeppniseftirlitsins segir að í tilboði IGS hafi falist beinskeytt og sértæk aðgerð gegn Vallarvinum sem hafi verið til þess fallin að draga úr umsvifum félagsins.

Gunnar Olsen, framkvæmdastjóri IGS, segir að ekki hafi verið tekin ákvörðun um það hvort úrskurðinum verði áfrýjað. Lögmenn IGS eigi eftir að fara yfir það en Gunnari finnst líklegra en ekki að ákveðið verði að áfrýja. Það muni liggja fyrir innan fjögurra vikna. Aðspurður hvort honum finnist sektarupphæðin í samræmi við eðli og umfang hins meinta brots segist Gunnar ekkert geta sagt til um það.