OR samþykkir að kanna orkusölu til Helguvíkur

Stjórn Orkuveitunnar samþykkti, með fimm atkvæðum gegn einu, þá tillögu Alfreðs Þorsteinssonar stjórnarformanns að fela forstjóra að gera úttekt á möguleikum Orkuveitunnar til að afla raforku til stóriðju í Helguvík. Samkvæmt samþykktinni á að kanna mögulega orkuöflun, flutningsleiðir, verð og hagkvæmni, öflun rannsóknaleyfa, áhrif virkjana á umhverfi og áhrif framkvæmda í tengslum við verkefnið á atvinnulífið. Þótt skilyrt sé að niðurstöðuna eigi að kynna stjórn og eigendum er samþykktin í raun stefnumarkandi um það að Orkuveitan er tilbúin að koma að álversuppbyggingu á Suðurnesjum.

Það var í maímánuði í fyrra, fyrir tíu mánuðum, sem R-listaflokkarnir stóðu sameiginlega að þeirri ákvörðun að taka ekki þátt í orkusölu til Helguvíkur. Núna hafa Samfylkingin og Framsóknarflokkurinn kúvent í málinu.

Fulltrúi vinstri grænna, Tryggvi Friðjónsson, segir niðurstöðuna óheppilega og að hún sé í andstöðu við samþykkt fulltrúa R-listans í stjórn Orkuveitunnar í fyrra. Hann lét bóka að hann teldi að skoða yrði stefnu Orkuveitunnar í orkusölu til stóriðju með heildstæðum hætti og fjalla ætti um málið á vettvangi meirihlutaflokkanna í borgarstjórn.