Ekki tímabært að afnema verðtryggingu lána

Stefna ber að því til lengri tíma litið að afnema verðtryggingu lána hér á landi en það er ekki hægt nú vegna þeirra sveiflna sem eru í þjóðfélaginu. Þetta sagði Halldór Ásgrímsson forsætisráðherra við utandagskrárumræðu um aukningu á skuldum þjóðarbúsins í dag.

Málshefjandinn Sigurjón Þórðarson úr Frjálslynda flokknum vakti athygli á því að skuldir þjóðarbúsins við útlönd umfram eignir hefðu aukist um 270 milljarða í fyrra. Hann benti einnig á að í því efnahagsumróti sem verið hefði síðustu vikur með neikvæðri umræðu um stöðu bankanna og lækkun á gengi krónunnar væri hætta á verðbólguskoti með tilheyrandi skuldaaukningu fyrir þjóðina. Hann spurði því forsætisráðherra meðal annars hvort til greina kæmi að afnema verðtryggingu til þess að lánastofnanir yrðu varkárari í útlánum og tækju þannig á sig aukna áhættu vegna hækkandi verðbólgu.

Sigurjón sagði enn fremur að með núverandi verðtryggingu myndi hækkandi verðbólga nær eingöngu bitna á viðskiptavinum bankanna þar sem þeir væru tryggðir í bak og fyrir. Frjálslyndir teldu að ef verðtryggingin yrði afnumin yrði erlend lántaka bankanna mun varfærnari.

Forsætisráðherra sagði óhjákvæmilegt að taka tillit til eigna þegar skuldir væru metnar og benti á að skuldir ríkissjóðs hefðu minnkað hröðum skrefum. Skuldastaða heimilanna væri vissulega áhyggjuefni eignir þeirra hefðu aukist um 1200 milljarða á síðustu árum. Hann sagði verðtryggingu á vissan hátt gallaða en erfitt væri að afnema hana nú.

Hann sagði að ef taka ætti upp gengistryggingu í staðinn lægi það fyrir að lán yrðu meira eða minna í erlendri mynt í stað íslenskra króna. Til lengri tíma litið teldi hann að stefna bæri að því að afnema verðtryggingu en við þau skilyrði sem nú væru uppi sæi hann ekki forsendur til þess.

Þingmenn stjórnarandstöðunnar sögðu stjórnvöld ekki standa sig í efnahagsstjórninni og bent var á að Seðlabankinn hefði hækkað stýri vexti í þrettánda sinn í morgun frá maí 2004. Stjórnarþingmenn sögðu hins vegar að þjóðin hefði aldrei verið betur í stakk búin til að borgar skuldir. Einar Oddur Kristjánsson, varaformaður fjárlaganefndar, benti á að menn þyrftu að hafa þrek til þess að varðveita þann árangur sem náðst hefði