Forðaði ráðherra sér úr ráðherrastólnum vegna álits Umboðsmanns?

Magnús Þór Hafsteinsson, Frjálslynda flokknum, segir fyrrverandi félagsmálaráðherra hafa forðað sér úr ráðherrastólnum til að þurfa ekki að svara fyrir ráðningu sína á ráðuneytisstjóra félagsmálaráðuneytisins. Þetta kom fram í umræðum á Alþingi í dag.

Í síðustu viku skilaði Umboðsmaður Alþingis áliti sínu á ráðningu Árna Magnússonar, fyrrverandi félagsmálaráðherra, á Ragnheiði Arnljótsdóttur sem ráðuneytisstjóra félagsmálaráðuneytisins fyrir tveimur árum en einn umsækjanda, Helga Jónsdóttir, kvartaði til umboðsmanns. Umboðsmaður er harðorður í áliti sínu og segir meðal annars að verulegir annmarkar séu á málsmeðferðinni.

Sigurjón Þórðarson, þingmaður Frjálslynda flokknsins, tók málið upp á Alþingi í dag þar sem hann sagði úrskurð umboðsmanns mikinn áfellisdóm. Jón Kristjánsson, núverandi félagsmálaráðherra, varð til svara þar sem forsætisráðherra var ekki viðstaddur umræðurnar. Hann benti á að umboðsmaður teldi ekki að þetta leiddi til ógildingu á skipan ráðuneytisstjóra. Hann myndi því að sjálfsögðu taka mið af ábendingum umboðsmanns, en sagði að þær kalli ekki á að önnur manneskja verði ráðin í starfið.

Magnús Þór Hafsteinsson, Frjálslynda flokknum, kvaðst sjá tengsl á milli álits umboðsmanns á ráðningunni og þess að Árni Magnússon skyldi segja af sér sem ráðherra á dögunum. Magnús sagði að hvorki Árni né ríkisstjórnin hafi getað þolað að ráðherrann fengi á sig þennan úrskurð. Því hafi það verið sett á svið að ráðherrann þyrfti að segja af sér vegna persónulegra ástæðna og að honum hafi boðist freistandi starf innan bankageirans.