Stjórnvöldum ber að fara sér hægt

Forstjóri Vinnumálastofnunar segir íslensk stjórnvöld eiga að fara sér hægt í að opna fyrir frjálsa för fólks frá hinum nýju aðildarríkjum Evrópusambandsins. Ráðamenn þurfa að taka ákvörðun fyrir 1. maí um það hvernig verði að málunum staðið.

Tíu ríki í Austur-Evrópu gengu í Evrópusambandið árið 2004 og þá ákváðu íslensk stjórnvöld að nýta ákvæði EES-samningsins og fresta því í tvö ár að heimila íbúum átta þessara ríkja til að starfa hér án atvinnuleyfa. Þann fyrsta maí næstkomandi þurfa stjórnvöld að vera búin að ákveða hvort framlengja eigi frestinn frekar, eða afnema takmarkanir að hluta til eða öllu leiti.

Gissur Pétursson, forstjóri Vinnumálastofnunar, segir mikilvægt að einhvers konar skráningarskylda sé fyrir þá erlendu ríkisborgara sem koma til landsins í atvinnuleit, til að tryggja að farið sé að lögum og að erlendir starfsmenn njóti sömu kjara og réttinda og Íslendingar. Gissur telur að réttast sé að takmarka frjálsa för fólks að einhverju leiti enn um sinn þar sem breytingar á atvinnuleysisbótakerfinu séu fyrirhugaðar. Þá þurfi hugsanlega að aðlaga ýmsa þætti í félags-og menntakerfinu að breyttum aðstæðum en fjölskyldur munu líklega flytjast með þeim erlendu ríkisborgurum sem koma hingað í atvinnuleit.

Finnbjörn A. Hermannsson, formaður Samiðnar, sambands iðnaðarfélaga, segir að Iðnaðarmönnum telji sig ekki stafa ógn af erlendum kollegum sem komi til landsins í atvinnuleit.

Hann segir frumskilyrði að erlendir ríkisborgarar sem komi hingað í atvinnuleit séu skráningarskyldir svo hægt sé að tryggja að farið sé að lögum og reglum. Að sama skapi sé slíkt þeim í hag og það sé óásættanlegt ef erlendir starfsmenn njóti ekki sömu kjara og réttinda og Íslendingar.