Ónóg lög um leyniþjónustur

Evrópuríki þurfa strangari reglur um eftirlit með leyniþjónustum sínum og betra eftirlit með erlendum útsendurum sem starfa innan landamæra þeirra. Þetta sagði Terry Davis, forseti Evrópuráðsins, þegar hann kynnti skýrslu Evrópuráðsins um fangaflug bandarísku leyniþjónustunnar CIA.

Rannsókn Evrópuráðsins leiddi ekki í ljós neinar óyggjandi sannanir fyrir því að bandaríska leyniþjónustan CIA hefði starfrækt leynileg fangelsi í Evrópu fyrir meinta fylgismenn Al-Kæda. Hún leiddi hins vegar í ljós að víða væri pottur brotinn.

Terry Davis, forseti Evrópuráðsins, sagði ljóst að löggjöf um leyniþjónustur væri ófullnægjandi í mörgum þeirra ríkja sem eiga aðild að Evrópuráðinu. Ætti það hvort tveggja við um leyniþjónustur viðkomandi landa og eftirlit með erlendum erindrekum. Hann sagði jafnframt að það væri nær ómögulegt fyrir stjórnvöld í aðildarríkjunum að vita hvort mannréttindasáttmáli Evrópu væri brotinn með flugi um lofthelgi þeirra.

Evrópuráðið krafði ríkisstjórnir allra aðildarríkja sinna um svör við spurningum um löggjöf sína og vitneskju um fangaflug CIA. Íslensk stjórnvöld svara því til að engin sértæk löggjöf sé um eftirlit með erlendum útsendurum. Þá segjast þau enga vitneskju hafa um að nokkur opinber starfsmaður eða embættismaður hafi hjálpað til við fangaflug né ástæðu til að ætla að svo hafi verið. Þess vegna hafi ekki þótt ástæða til að hefja opinbera rannsókn. Enn fremur segir í svarinu að stjórnvöld hafi ekki talið ástæðu til að hefja upplýsingaöflun um farþega allra flugvéla sem lenda á íslenskum flugvöllum.