12 manna fjölskylda myrt

Að minnsta kosti sjö létu lífið og tugir særðust þegar bílsprengja sprakk fyrir stundu á fjölförnum markaði í borginni Kerbala í Suður-Írak í morgun. Svo virðist sem sprengjan hafi verið fjarstýrð.

Árásin var gerð aðeins nokkrum klukkustundum eftir að byssumenn réðust inn í hús í borginni Baquba í Norður-Bagdad og myrtu tólfmanna fjölskyldu sjía múslima.

Útgöngubann er enn í gildi í höfuðborginni Bagdad og voru fáir á ferli þar í morgun. Óttast er að borgarastyrjöld kunni að brjótast út í landinu en átök milli sjía og súnní-múslima hafa færst í aukana síðan ein helgasta moska sjía-múslima var sprengd í loft upp á miðvikudag.

Ibrahim al-Jaafari, forsætisráðherra Íraks hét því í gær að þær moskur sjía og súnnía, sem hefðu eyðilagst í átökunum, yrðu reistar á ný.