Neyðarástandi lýst yfir

Gloria Arroyo forseti Filippseyja lýsti yfir neyðarástandi í landinu í dag í kjölfar þess að upplýst var um áætlanir háttsettra hershöfðingja í filippeyska hernum um að ræna völdum.

Óeirðalögregla beitti engum vettlingatökum þegar hún dreifði um fimm þúsundum mótmælendum sem kröfðust afsagnar forsetans, Gloriu Arroyo, á götum höfuðborgarinnar Manila í morgun. Sú tilkynning hafði þá borist að herinn hefði komið í veg fyrir valdarán í landinu.

Í sjónvarpsávarpi fullyrti Arroyo að stjórnarandstaðan, ásamt öfgahægrimönnum og kommúnistum, væri staðráðin í að knésetja lýðræðislega kjörna stjórn landsins.

Öryggisgæsla við opinberar byggingar var hert, kennsla felld niður í skólum og leyfi til fundahalda á morgun, í tilefni af því að 20 ár eru liðin frá því að Ferndinand Marcos forseti var hrakinn frá völdum. Vart er hægt að segja að valdarán eða tilraun til valdaráns séu fátíð í landinu en það er sú leið sem farin hefur verið síðustu áratugi til stjóranarbreytinga. Auk Marcos var Joseph Estrada forseti hraktur frá völdum og Arroyo er orðin ýmsu vön eftir fimm ár í forsetastól. Hún hefur staðið af sér tvær valdatilraunir og slapp við ákæru um kosningasvik og spillingu á síðasta ári.