Þrjú handtekin vegna stærsta ráns í sögu Bretlands

Þrír hafa verið handteknir vegna ránsins í fjárhirslu Securitas í Kent, skammt utan við London, í fyrradag en þetta er langstærsta rán í sögu Bretlands.

Að sögn lögreglu eru hin handteknu tuttugu og níu ára gamall karlmaður og tvær konur á fertugs- og fimmtugsaldri. Lögreglan hefur einnig tekið fimm bíla í vörslu sína en grunur leikur á að að minnsta kosti einhverjir þeirra hafi verið notaðir í tengslum við ránið.

Ræningjarnir, sem dulbjuggust sem lögregluþjónar við verknaðinn, komust á brott með allt að sex milljarða íslenskra króna. Rúmlega tvö hundruð milljónum króna hefur verið heitið fyrir upplýsingar sem leitt geta til handtöku ræningjanna.