Mannskæður bruni í textílverksmiðju í Bangladesh

Að minnsta kosti 52 létu lífið og 150 slösuðust þegar eldur kviknaði í textílverksmiðju í suð-austur hluta Bangladesh í gærkvöldi.

Rúmlega 1000 starfsmenn, aðallega konur, voru við vinnu þegar eldurinn kviknaði og tókst flestum þeirra að bjarga sér út. Björgunarmenn leita nú í rústum byggingarinnar að einhverjum sem kunni að liggja þar á lífi.

Verksmiðjan var á þremur hæðum og aðeins einn útgangur á henni. Því þurftu starfsmenn á efri hæðunum að klöngrast niður þröngan stiga, sem gekk erfiðlega. Reyndu því sumir að bjarga sér með því að henda sér út um glugga.

Talið er að eldurinn hafi kviknað út frá neista úr rafmagnsverkfæri og jókst hann þegar rafall og gufuketill sprungu.