Handtekin vegna stærsta ráns í sögu Bretlands

Kona og maður hafa verið handtekin vegna ránsins í fjárhirslu Securitas í Kent, skammt utan við London, í fyrradag en þetta er langstærsta rán sem framið hefur verið í sögu Bretlands.

Að sögn lögreglu eru hin handteknu 29 ára gamall karlmaður og rúmlega þrítug kona og voru þau handtekin hvort í sínu lagi í suðurhluta Lundúna í gær. Lögreglan hefur einnig tekið fimm bíla í vörslu sína en grunur leikur á að að minnsta kosti einhverjir þeirra hafi verið notaðir í tengslum við ránið.

Ræningjarnir, sem dulbjuggust sem lögregluþjónar við verknaðinn, komust á brott með jafnvirði allt að sex milljarða íslenskra króna. Jafnvirði rúmlega 200 milljóna króna hefur verið heitið fyrir upplýsingar sem leitt gætu til handtöku ræningjanna.