Olíu hellt á eldinn

Ein fegursta og helgasta moska síjamúslíma var sprengd í loft upp í Írak í morgun. Enginn vafi leikur á að ætlun illvirkjanna hafi verið að magna ófriðinn á milli þjóðarbrotanna í landinu enda hafa árásir verið gerðar á helgidóma súnnía í dag.

Gullna moskan í borginni Samarra, skammt norður af höfuðborginni Bagdad, er ein sú helgasta í augum sjía-múslima en þar eru grafnir tveir hinna svonefndu ímama, afkomendur Múhameðs spámanns sem álitnir eru ginnheilagir. Nú stendur þar hins vegar tæpast steinn yfir steini eftir að óþekktir sprengjumenn óðu þangað inn í morgun og kveiktu á vítisvélum sínum. Aðeins er sólarhringur síðan 22 létust í bílsprengjuárás sem var gerð í sjíahverfi í Bagdad þannig að svo virðist sem verið sé að efna til ófriðar á milli þjóðarbrotanna í landinu enn eina ferðina. Ólgan er strax farin að vaxa því síðdegis þustu ævareiðir stuðningsmenn Muqtada al-Sadr, eldklerksins frá Najaf, út á götur höfuðborgarinnar í dag og létu ófriðlega.

Sjíar eru drjúgur meirihluti landsmanna en grunnt hefur verið á því góða með þeim og súnníum í gegnum aldirnar. Ali al-Sistani erkiklerkur og Ibrahim al-Jaafari forsætisráðherra hvöttu í dag landsmenn til að sýna stillingu.

Þrátt fyrir þessi hvatningarorð virðist ætlunarverk árásarmannanna hafa heppnast því ráðist var á sex súnníamoskur í Bagdad og tvær í Basra. Til að bæta gráu ofan á svart er stjórnarmyndunarviðræður í landinu ennþá í algerum hnút, heilum tveimur mánuðum eftir þingkosningarnar í desember, og við þær aðstæður er hætta á að ófriðarbálið magnist enn frekar.