Danahatur breiðist út

Danahatur breiðist út í múslímalöndum eins og eldur í sinu. Æstur múgur réðst inn í dönsku ræðismannsskrifstofuna í Líbanon í dag og kveikti í henni. Öfgasinnaðir trúarleiðtogar hvetja liðsmenn sína til morða og hryðjuverka í Danmörku.

Dönsk stjórnvöld hafa gagnrýnt yfirvöld í Sýrlandi harðlega fyrir að hafa ekki komið í veg fyrir árásir á sendiráð þeirra og hefur Bandaríkjastjórn tekið í sama streng. Óafsakanlegt sé að hægt sé að fremja svo mikil skemmdarverk á sendiráðum. Sýrlensk stjórnvöld segja þó Dani geta sjálfum sér um kennt. Og óeirðir héldu áfram í dag og réðst æstur múgurinn inn í dönsku ræðismannsskrifstofuna í Beirút í Líbanon og kveikti í þeim. Þar reyndu þó yfirvöld að koma í veg fyrir árásirnar en yfir tvö þúsund hermenn reyndu að fæla lýðinn frá en með litlum árangri. Yfir tuttugu manns særðust í átökunum en ekki er vitað til að nokkur hafi fallið. Dönsk yfirvöld hafa hvatt sitt fólk til að yfirgefa Líbanon og Sýrland. Öfgasinnaðir múslimar hafa hvatt liðsmenn sína til að drepa Dani, hvar sem þá er að finna. Gríðarleg spenna ríkir nú milli Dana og múslima en í Bretlandi, Tyrklandi, Írak, Pakistan og Afganistan hefur myndbirtungum einnig verið mótmælt. Slagorð gegn Danmörku hafa verið hávær og þess krafðist að teiknararnir, sem eru í felum undir verndarvæng lögreglunnar, verði teknir af lífi. En æsingurinn er ekki minni heimafyrir. Þar hafa svokallaðir þjóðernissinnar mótmælt veru múslima í landinu undir slagorðinu Danmörk fyrir Dani. Erfitt ætlar að reynast fyrir Anders Fogh Rasmussen, forsætisráðherra Dana að lægja öldurnar. Hann hefur persónulega lýst andúð sinni á myndunum en þó sagt að það sé ekki hans verk að segja ristjórn blaðanna hvað megi og hvað megi ekki birta. Stjórnvöld ýmissa múslimalanda hafa hvatt fólk til að kaupa ekki danskar vörur og Íranar hafa til að mynda ákveðið að öllum viðskiptasamningum við þau lönd sem birt hafa skopmyndirnar verði rift. Utanríkisráðuneytið segist ekki vita hvort Íslendingar séu á svæðinu en að vel sé fylgst með stöðu mála.