Minningarathöfn í París

Jacques Chirac, forseti Frakklands, og fleiri stjórnmálamenn og trúarleiðtogar þar í landi tóku í gær þátt í minningarathöfn um ungan mann af gyðingaættum sem fannst nær dauða en lífi á sorphaugum í París í síðustu viku.

Pilturinn lést á leið á spítala en honum var rænt þremur vikum áður og hafði verið haldið föngnum í kjallara húss í úthverfi Parísar. Þar leið hann hrottalegar pyntingar en líkami hans var meðal annars þakinn brunasárum þegar hann fannst.

Talið er fullvíst að morðið tengist því að hinn látni var gyðingatrúar og gengu hundruð Parísarbúa um götur borgarinnar í gær til að tjá andstöðu sína við ódæðið. Fjöldi fólks hefur verið handtekinn vegna málsins, þar á meðal forsprakki glæpaklíku sem grunuð er um verknaðinn. Sá fannst á Fílabeinströndinni og er nú unnið að því að fá hann framseldan.