Vikið úr starfi fyrir ummæli um blaðamann af gyðingaættum

Ken Livingstone, borgarstjóri Lundúna, hefur verið vikið úr starfi í mánuð fyrir ummæli sín um blaðamann af gyðingaættum. Rauði Ken, eins og hann er oft kallaður, bar blaðamanninn saman við fangavörð í útrýmingabúðum nasista.

Ummæli Livingstone voru kærð til nefndar sem tekur á málum sem þessum. Maðurinn króaði Livingstone af eftir veislu fyrir ári og kynnti sig sem blaðamann breska blaðsins Evening Standard sem borgarstjóranum mun mikið í nöp við. Við það tækifæri lét Livingstone ummælin falla.

Livingstone segir niðurstöðuna brjóta gegn lýðræðinu. Þeir sem hafi rekið hann í frí séu ekki kjörnir af almenningi. Livingstone hefur ekki ákveðið hvort hann áfrýjar úrskurðinum.