Kjartan Gunnarsson hættir sem framkvæmdastjóri Sjálfstæðisflokksins

Kjartan Gunnarsson er hættur sem framkvæmdastjóri Sjálfstæðisflokksins. Kjartan hefur verið framkvæmdastjóri flokksins síðustu 26 árin en hann tók við starfinu 1. október 1980. Kjartan tilkynnti um þetta á miðstjórnarfundi flokksins sem nú stendur yfir og tekur Andri við á næstu vikum.

Andri Óttarsson er 31 árs gamall. Hann lauk embættisprófi í lögfræði frá Háskóla Íslands árið 2001. Andri hefur starfað hjá Lögmönnum við Austurvöll frá útskrift sinni og verið meðeigandi í stofunni frá 2004.

Andri hefur síðasta árið stundað meistaranám í mannréttindum við Raoul Wallenberg stofnunina og Háskólann í Lundi í Svíþjóð.

Í tilkynningu frá Sjálfstæðisflokknum segir að Andri hafi gengt margvíslegum trúnaðarstörfum fyrir Sjálfstæðisflokkinn. Hann hafi setið í stjórn Heimdallar og í stjórn Sambands ungra sjálfstæðismanna. Hann sitji nú í Útvarpsráði fyrir flokkinn og hefur hann komið að kosningastjórn víða um land.

Andri var oddviti Vöku, félags lýðræðissinnaðra stúdenta, í stúdentaráði Háskóla Íslands 1998-1999. Hann var frá árinu 2002-2005 stjórnarformaður Félagsstofnunar stúdenta og hann hefur frá árinu 2005 verið ritstjóri Deiglunnar vefrits um þjóðmál.