Samnýting grunnneta möguleg hjá Símanum og Orkuveitunni

Síminn og Orkuveita Reykjavíkur hafa um nokkurt skeið átt í viðræðum um samnýtingu á grunnnetum fyrirtækjanna. Verið að skoða hvort mögulegt verði að leita samlegðaráhrifa við rekstur netanna tveggja til hagsbóta fyrir viðskiptavini segir í Yfirlýsingu frá Símanum. Orkuveitan hefur gert samninga við fjögur sveitarfélög um ljósleiðaravæðingu heimila: Reykjavíkurborg, Seltjarnarnesbæ, Akraneskaupstað og Hveragerðisbæ. Orkuveitan rekur ljósleiðarakerfi til fyrirtækja á höfuðborgarsvæðinu. Ljósleiðaranet Símans nær um allt land. Það er 4.500 km. að lengd og hefur uppbygging þess tekið 20 ár. Nú tengjast nánast öll heimili landsins netinu á einhvern hátt og um 40.000 heimili hafa aðgang að þjónustu á ljósleiðaraneti Símans á höfuðborgarsvæðinu, annaðhvort með hreinum ljósleiðara í hús eða í gegnum Breiðband Símans. Frekari upplýsingar er ekki mögulegt að veita um viðræðurnar að svo stöddu.