Ítalir kjósa til þings í dag og á morgun

Þingkosningar eru hafnar á Ítalíu en kjörstaðir voru opnaðir snemma í morgun. Fjörtíu og sjö milljónir Ítala eru á kjörskrá og hefur kjörsóknin framan af morgni verið bærileg. Ítölsk lög banna birtingu skoðanakannana hálfum mánuði fyrir kjördag en ef marka má síðustu könnunina sem var gerð hafði Ólífubandalag Romano Prodi fimm prósentustiga forskot á fylkingu hægri- og miðflokka sem Silvio Berlusconi forsætisráðherra veitir forystu. Kosningabaráttan hefur verið hörð og helstu málefni, til dæmis efnahagsmál, fallið í skuggann á hnútukasti þeirra Berlusconi og Prodi. Kjörfundi lýkur á morgun.