Framsóknarþingmaður gagnrýnir niðurskurð vegaframkvæmda

Íbúar svæða sem búa við það að ófærir fjallvegir hindri för þeirra dögum og vikum saman til nágrannabyggða leggja eflaust betur á minnið en aðrir yfirlýsingar eins og þá sem samgönguráðherra gaf á dögunum um að stórátak væri hafið í vegamálum. Stjórnarþingmaðurinn Kristinn H. Gunnarsson vekur hins vegar athygli á því á heimasíðu sinni að í nýju frumvarpi leggi ríkisstjórnin til að frestað verði vegagerð á næsta ári fyrir 200 milljónir króna á Vestfjörðum og 300 milljónir á norðausturlandi.

Kristinn segir á heimasíðu sinni:

"Einkennileg röðun brýnna vegaframkvæmda birtist í nýju frumvarpi ríkisstjórnarinnar. Þar er lagt til að fresta framkvæmdum við vegabætur á Vestfjörðum og Norðausturhorni landsins, annars vegar nýjum vegi um Arnkötludal og Tröllatunguheiði milli Strandasýslu og Reykhólasveitar og hins vegar nýjum vegi um svonefnda Hófaskarðsleið á Melrakkasléttu. Fjárveitingar samtals 500 mkr. eru færðar til um ár, frá 2007 til 2008, 200 mkr. af Arnkötludal og 300 mkr. af Hófaskarðsleið. Í báðum tilvikum seinkar framkvæmdum, ef tillögur ríkisstjórnarinnar ná fram að ganga. Og í báðum tilvikum er um að nauðsynlegar vegabætur á landssvæðum þar sem byggð stendur höllum fæti."