VG fær ekki leyfi fyrir kosningaskrifstofu

Bæjarráð Mosfellsbæjar synjaði í gær umsókn Vinstri grænna um staðsetningu fyrir kosningaskrifstofu þeirra í miðbæ Mosfellsbæjar. Fulltrúar minnihluta B-lista og G-lista lýstu undrun með þessa ákvörðun í bókun og að húsið skuli hafa verið flutt einmitt á þessum tímapunkti.

Húsið sem um ræðir er í eigu björgunarsveitarinnar Kyndils og var notað til flugeldasölu í kringum áramótin síðustu. Leyfi fyrir staðsetningu hússins í miðbæ Mosfellsbæjar rann síðan út hinn 15. janúar. Húsið stóð hins vegar óhreyft við hlið leikhúss bæjarins þar til á mánudag í þessari viku.

Á fimmtudagskvöldið í síðustu viku, þegar frést hafði af fyrirætlunum Vinstri grænna um að opna kosningamiðstöð í húsinu, hringdi Ragnheiður Ríkharðsdóttir, bæjarstjóri og oddviti sjálfstæðismanna í Ingvar Þór Stefánsson, formann björgunarsveitarinnar, til að reka á eftir flutningi hússins. Húsið var svo flutt á mánudag eins og áður sagði.

Umsókn Vinstri grænna um fá að hafa húsið áfram í miðbænum til að reka þar kosningaskrifstofu fyrir bæjarstjórnarkosningarnar í vor var svo tekin fyrir hjá bæjarráði í gær. Meirihluti Sjálfstæðismanna hafnði umsókninni á þeim forsendum að ekki væru fordæmi fyrir slíkri leyfisveitingu.