Aðstoðarmenn dómara fái aukin völd

Þar til fyrir átta árum síðan gátu dómarafulltrúar farið með hluta dómsstarfa til að létta á álagi héraðsdómara. Þetta fyrirkomulag var fellt niður með dómstólalögum. Þá var opnað fyrir að ráðnir yrðu aðstoðarmenn sem gætu undirbúið mál fyrir dómara en dómari þarf ávallt að staðfesta alla gjörninga.

Nú stendur til að breyta þessu. Samkvæmt frumvarpi Björns Bjarnasonar dómsmálaráðherra geta dómstjórar í héraðsdómum falið aðstoðarmönnum aukin verkefni. Þeirra á meðal má nefna þingfestingu og meðferð einkamála þegar greinargerðir vantar, meðferð gjaldþrotamála og aðfararbeiðna og skýrslutöku ef hún fer fram fyrir öðrum dómi.

Samhliða þessu eru gerðar auknar kröfur um hæfi aðstoðarmanna. Þeir verða eins og hingað til að vera lögfræðimenntaðir en nú bætast við kröfur um starfsreynslu. Aðstoðarmenn þurfa að hafa tveggja ára reynslu af lögfræðistörfum og geta öðlast hana með þrennum hætti, einn er með málflutningsstörfum, annar með lögfræðistörfum fyrir ríki eða sveitarfélög og sá þriðji að aðstoðarmennirnir hafi setið á Alþingi.