Íslenska ríkið sýknað af bótakröfu

Héraðsdómur Reykjavíkur hefur sýknað íslenska ríkið af bótakröfu manns sem úrskurðaður var í gæsluvarðhald vegna gruns um að hann tengdist fíkniefnasmygli árið 2004. Við rannsókn kom ekkert fram sem benti til þess að maðurinn tengdist málinu og krafðist hann 11 milljóna króna í miskabætur en þeirri kröfu hafnaði héraðsdómur.

Í febrúar 2004 tóku tollverðir til skoðunar vörusendingu frá Nepal sem innihélt rúmlega 10 kíló af hassi og var sendingin stíluð á manninn. Þegar hann leysti vöruna út var hann handtekinn og síðan úrskurðaður í gæsluvarðhald. Maðurinn hélt því statt og stöðugt fram að hann vissi ekkert um sendinguna en þar sem hann hafi fengið tilkynningu um hana hafi hann leyst hana út. Ekkert kom fram við rannsókn sem tengdi manninn við málið að öðru leyti og var honum sleppt úr gæsluvarðhaldi eftir viku.

Í niðurstöðu dómsins segir að telja verði eðlilegt í ljósi atburðarásarinnar, og þess að maðurinn hafði áður hlotið dóm fyrir fíkniefnamisferli, að rökstuddur grunur hafi fallið á hann um að hann hefði framið brot og réttmætt hafi verið að handtaka stefnanda við þessar aðstæður. Ekki hafi verið sýnt fram á annað en að uppfyllt hafi verið lagaskilyrði til þess að kveða á um gæsluvarðhald.

Þá segir dómurinn, að ekki þykir sýnt fram á í málinu að ríkið beri ábyrgð á umfjöllun fjölmiðla um umrætt mál eða ábyrgð á meintum mannorðsmissi mannsins.