Vímulaus æska fær styrk

Félagsmálaráðuneytið og Vímulaus æska hafa gert með sér styrktarsamning þar sem félagsmálaráðuneytið leggur starfsemi samtakanna lið með fjárstuðningi til næstu tveggja ára en samningur þess efnis var undirritaður í gær. Samningurinn gerir samtökunum kleift að vinna áfram fjölbreytt fornvarnarstarf meðal íslenskra fjölskyldna.

Fimmtudaginn 30. mars 2006, undirritaði Jón Kristjánsson félagsmálaráherra og Anna Ólafsdóttir Björnsson formaður Vímulausrar æsku styrktarsamning þar sem félagsmálaráðuneytið leggur starfsemi samtakanna lið með fjárstuðningi til næstu tveggja ára. Jón Kristjánsson, núverandi félagsmálaráðherra, hefur um langt skeið lagt Vímulausri æsku lið og oft styrkt starf þeirra á umliðnum árum, fyrst sem heilbrigðis- og tryggingamálaráðherra og nú sem félagsmálaráðherra.

Vímulaus æska - foreldrasamtök voru stofnuð árið 1986 en samtökin hafa haldið uppi fjölbreyttu forvarna- og ráðgjafastarfi í vímuvörnum samfellt í þessa tvo áratugi. Þjónusta foreldrahúss, sem samtökin settu á laggirnar árið 1998, er opin öllum landsmönnum en þangað leita mikið foreldrar vegna barna sem leiðst hafa útí vímuefnaneyslu. Vímulaus æska rekur m.a. FORELDRASÍMANN 581 1799 sem opinn er allan sólarhringinn og bjóða einnig uppá forvarnanámskeið fyrir börn og foreldra. Um 4000 símtöl voru skráð í Foreldrasímann á síðasta ári. Til að halda áfram með stuðning og ráðgjöf fyrir foreldra var Vímulausri æsku boðinn þessi styrktar- og þjónustusamningur við félagsmálaráðuneytið en hann gerir samtökunum kleift að vinna áfram fjölbreytt forvarnastarf meðal íslenskra fjölskyldna.