Cisse flýgur fugla hæst

Úrslitin í síðustu æfingaleikjum fyrir HM eru umhugsunarefni, sérstaklega er skrýtið hvað Sven Göran Eriksson var ánægður eftir leik Englendinga við Unghverja á þriðjudagskvöldi. Þeir unnu 3-1, fínt, tvö mörk úr föstum leikatriðum, Beckham með stórkostlegar aukaspyrnur, og skakki turninn Peter Crouch með það þriðja.

En hvað, skemmtilegur fótbolti? Nei. Áhrifaríkur? Kannski, en erfitt að sjá að hin meinta nýja leikaðferð, með Jamie Carragher sem aftasta mann á miðjunni sé neitt umfram það sem Englendingar hafa sýnt síðustu tuttugu ár, þrjátíu ár.

David Pleat, fyrrum framkvæmdastjóri Tottenham og Sheffield Wednesday var ekki hrifinn í grein í The Guardian: ,,Jamie kann að verjast en getur engan veginn sent boltann, þetta er ekki töfralausn Englendinga á miðsvæðinu.'' Það er augljóst að enska liðið er samt sem áður með bestu miðjuna, gott ef ekki á HM, Beckham, Gerrard, Cole og Lampard, allir flottir, en þá þýðir ekki að vera með algerlega bensínlausan senter þar fyrir framan.

Owen er vitaskuld nýkominn úr meiðslum, en alveg hörmulega slakur, sjáum hvort hann hressist í leiknum við Jamæka á laugardaginn. Má ég þá heldur biðja um alvöru striker, leifturárás einsog Djibri Cisse sem Liverpool virðist ekki hafa þörf fyrir, hann fór út peysunni í æfingaleik sem Frakkar spiluðu í gærkvöldi við Danmörku, og augljóst afhverju maðurinn er svona hættulegur.

Hann er með vængi og ef hann fær að spila með Henry í fremstu víglínu Frakkana, frekar en David Trezeguet, þá er komið nýtt Air France flugfélag í fótboltann. Því ef það er eitthvað sem við áhorfendur viljum sjá á HM, þá er það himnesk tilþrif, ekki bara í vörn, heldur sókn, og þess vegna er Michael Owen einsog löskuð tvíþekja, í samanburði við frönsku fuglana.