Urtan Kobba kæpti í nótt

Í nótt kæpti urtan Kobba og heilsast móður og afkvæmi vel. Særún kæpti 5. júní síðast liðinn og er Kobba því önnur urtan í Húsdýragarðinum sem búin er að kæpa. Faðirinn er selurinn Snorri en fyrir á hann urtuna Esju sem mun ekki gegna neinu sérstöku hlutverki við uppeldi systkina sinna nema helst að kenna þeim skemmtileg sundtök í lauginni.

Kóparnir munu nærast á móðurmjólkinni fyrstu fjórar vikurnar í lífi sínu og vega þeir um 15 kíló við fæðingu. Strax eftir fæðingu eru þeir svo mjög sprækir og tilbúnir til sunds. Þeir þyngjast hratt fyrstu tvær vikurnar og geta tvöfaldað þyngd sína á þremur vikum. Móðirin hefur því greinilega mjög næringarmikla mjólk fram að færa enda stendur uppeldið ekki lengi yfir, eftir rúmlega fjórar vikur bítur móðirin kópinn af sér og hann þarf að fara afla sér fæðu sjálfur.