Óttast að starfsemi Byggðastofnunar verði fyrir bí

Þingmaður Samfylkingarinnar í Norðvesturkjördæmi óttast að starfsemi Byggðastofnunar verði lögð af með nýju frumvarpi iðnaðar- og viðskiptaráðherra um sameiningu stofnunarinnar og fleiri stofnana í Nýsköpunarmiðstöð Íslands. Þrátt fyrir að bankarnir hafi aukið lánastarfsemi sína úti á landi séu veik svæði sem stofnun eins og Byggðastofnun verði að sinna.

Valgerður Sverrisdóttur, iðnaðar- og viðskiptaráðherra, kynnti í fyrradag frumvarp sem gerir ráð fyrir sameiningu Byggðastofnunar, Iðntæknistofnunar og Rannsóknarstofnunar í eina stofnun, Nýsköpunarmiðstöð Íslands á Sauðárkróki. Markmiðið er að efla atvinnuþróun og nýsköpun á landsbyggðinni.

Einar Oddur Kristjánsson, formaður fjárlaganefndar Alþingis, sagði í fréttum í gær að sjálfstæðismenn ættu eftir að taka afstöðu til frumvarpsins og gagnrýndi það að iðnaðarráðherra hefði kynnt málið á sérstökum blaðamannafundi áður en afstaða stjórnarflokkanna lá fyrir.

Og það eru fleiri sem hafa athugasemdir við málatilbúnaðinn. Anna Kristín Gunnarsdóttir, þingmaður Samfylkingarinnar í Norðvesturkjördæmi, segir kynninguna vægast sagt óvenjulega. Ráðherra hafi greinilega kynnt hugmyndirnar í atvinnulífinu eftir því sem fram komi í fréttum. Ráðherrann haldi auk þess blaðamannafund á sama tíma og verið sé að ræða málið í stjórnarflokkunum sem sé mjög óvenjulegt. Það hafi vakið hörð viðbrögð hjá samstarfsflokknum. Almennir þingmenn hafi hins vegar ekki fengið frumvarpið og viti því ekki hvað í því er fyrir utan það sem fram komi í fréttum.

Anna segir að út frá þeim tillögum sem hún hafi heyrt af í fjölmiðlum finnist henni jákvætt að aðalstöðvar stórrar ríkisstofnunar verði úti á landi. Hins vegar sé mjög miður ef fulltrúi atvinnulífsins eigi ekki að sitja í stjórn hinnar nýju stofnunar.

Þá hefur Anna áhyggjur af því hvernig núverandi hlutverki Byggðastofnunar verði sinnt. Hún segir að þrátt fyrir að bankarnir hafi aukið lánastarfsemi sína úti á landi séu veik svæði sem stofnun eins og Byggðastofnun verði að sinna.

Aðspurð um hvort hún óttist að hlutverk Byggðastofnunar verið fyrir bí með nýjum hugmyndum segir Anna að henni þyki athyglisvert að Einar Oddur Kristjánsson, sem hafi verið ásamt Magnúsi Stefánssyni, þingmanni Framsóknarflokksins, í nefnd sem vinna átti að tillögum að endurskipulagningu Byggðastofnunar, telji þetta aðferð iðnaðar- og viðskiptaráðherra til að leggja stofnunina niður. Hún hallist að því að það sé eitthvað til í orðum Einars.