Yfirlýsing allra Háskóla

Rektorar allra háskóla á landinu undirrituðu sameiginlega yfirlýsingu um forsendur og frelsi háskóla. Samkvæmt henni er ein mikilvægasta skuldbinding háskóla sú að standa vörð um akademískt frelsi sem sé forsenda þess að háskólastarf þróist áfram. Akademískt frelsi felur það í sér, samkvæmt yfirlýsingunni, að einstaklingur geti leitað þekkingar og tjáð sannfæringu sína án þess að eiga á hættu að það bitni á starfsöryggi hans eða öðrum mikilvægum hagsmunum. Einnig er kveðið á um þá stjórnunarhætti sem standa vörð um akademískt frelsi og jafnframt er kveðið á um fjárhagleg skilyrði þess að háskólar geti sinnt hlutverki sínu. Þeim skuli heimilt að skapa sér sína eigin tekjustofna, ákveða sjálfir hvernig þeir fara með sjálfsaflafé sitt og stofna fyrirtæki sjálfum sér til hagsbóta. Ennfremur lýsa háskólarnir því yfir að það sé hlutverk ríkisvaldsins að tryggja jöfn tækifæri til náms.