Þvær hendur sínar af mótmælanda

Náttúruvaktin þvær hendur sínar af Ólafi Páli Sigurðssyni, sem er einn þriggja mótmælenda, sem skvettu grænleitum vökva á ráðstefnugesti á álráðstefnu á Nordica hóteli í gær. Þremenningarnir voru enn í haldi lögreglu skömmu fyrir hádegisfréttir. Náttúruvaktin sver aðgerðirnar á Nordica-hótelinu af sér en þegar hún varð að fullgildum samtökum í október síðastliðnum kom samt fram á heimasíðu hennar að Ólafur Páll Sigurðsson, einn hinna handteknu, gegndi starfi framkvæmdastjóra þar. Þrátt fyrir það segir Ásta Þorleifsdóttir, stjórnmarmaður Náttúruvaktarinnar, hann þó ekki hafa gegnt því starfi frá því í október, en hann sé einn af mörg hundruð meðlimum samtakanna. Svo róttæk mótmæli séu ekki á könnu Náttúrvaktarinnar, en þau trúi því að mestur árangur náist hægt og sígandi. Þrír náttúruverndarsinnar réðust í gær til atlögu gegn ráðstefnugestum á álráðstefnu á Nordica-hótelinu en ætlunin var að skvetta grænum vökva m.a. á forstjóra álversins á Reyðarfirði. Vökvinn fór einnig á innréttingar og tölvubúnað og olli einhverju tjóni. Lögreglan í Reykjavík gaf þær upplýsingar um hálftólfleytið að þremenningarnir sem handteknir voru væru enn í yfirheyrslu.