G-listinn liðin tíð

Ákveðið var á félagsfundi Samfylkingarinnar í vikunni að bjóða fram S-lista í bæjarstjórnarkosningunum eftir eitt ár. Þar með er síðasti G-listinn í landinu liðin tíð. Lögð var fram tillaga á aðalfundi Samfylkingarfélagsins í mars að Samfylkingin myndi bjóða fram sérstakan S-lista í kosningunum og var þeirri tillögu vísað til félagsfundar. Það var gert og ofangreind ákvörðun samþykkt einróma. Jónas Sigurðsson bæjarfulltrúi situr í bæjarstjórn Mosfellsbæjar fyrir G-listann. Hann segir að á bak við G-listann hafi verið bæjarmálafélagið Mosfellingur, samstarfsvettvangur Samfylkingarinnar og Vinstri-Grænna, og verður sá listi þá ekki borinn fram aftur, allavega ekki með Samfylkingunni innanborðs. Jónas ætlar að gefa kost á sér til að leiða S-listann næsta vor. Hann segir að ekki hafi verið neinn málefnaágreiningur milli Samfylkingarinnar og Vinstri-Grænna og Samfylkingin sjái fyrir sér að menn geti starfað saman að bæjarmálum þó að í öðru formi sé.