Á níræðisaldri um heimsins höf

Bandarísk hjón á níræðisaldri láta ekkert stoppa sig þegar þau sigla um heimsins höf á snekkjunni sinni. Þau eru nú stödd hér á landi og halda á næstu dögum í fimm þúsund sjómílna ferðalag. Snekkjan sem hjónin Len og Anne Tower sigla á er metin á um 120 milljónir og um borð eru öll nútímaþægindi: tvö hjónarúm, sturta og tvö klósett. Len og Anne hafa siglt víða á skútunni sinni og þau eru með tvo menn í áhöfn. Ferðalagið hófst í Flórída á síðasta ári þar sem þau búa en þau sigldu upp með austurströnd Bandaríkjanna og fyrir suðurodda Grænlands. Anne lenti í slysi í miklum sjó en þau láta það ekki stoppa sig. Len segir að það hafi tekið einn og hálfan sólarhring að sigla fyrsta áfangann vegna veðursins, en snekkjan gangi tíu sjómílur á klukkustund. Fyrsta hálfa sólarhringinn hafi sjórinn verið sléttur en svo hafi þau lent í stórsjó með allt að tíu metra háum öldum, en þau hafi þó haldið áfram. Í óveðrinu hafi Anne rekið sig harkalega í dyrakarm og brotið sjö rif og því hafi hún farið á Landspítalann þegar hingað var komið. Aðspurð hvort hún hafi jafnað sig segir Anne að það hafi hún gert. Læknirinn hafi reyndar ráðlagt henni að slaka á í fjóra daga en það hafi hún ekki viljað því þau hafi þurft að halda áleiðis heim. Þau fari eftir tvo daga. Spurð hvort þeim líki vel á sjónum játa þau því en segja þó að sjólagið í óveðrinu hafi verið óskemmtilegt. Þau hafi stundað sjóinn í 50 ár og síðasta ferð þeirra hafi verið 5840 sjómílur. Þegar Len var á miðjum aldri missti hann allan sinn lífeyri þegar fyrirtæki sem hann vann hjá fór á hausinn. Hann og kona hans stofnuðu þá blómabúð í New York og í dag eru fyrirtæki í þeirra eigu í margs konar rekstri. Þau hjónin segjast njóta efri áranna vel á sjónum. Þau segjast góðir vinir sem verði nánari á sjónum. Þau hafi verið gift í 59 ár og séu mjög hamingjusöm en kolklikkuð. Frá Íslandi er ferð þeirra Lens og Anne heitið til Mallorca með ýmsum krókaleiðum til fjölmargra landa. Þaðan verður snekkjan flutt í skipi til Flórída þar sem þau áætla að verða í byrjun nóvember.